城市系 - 九彩選舉 (今天‧由你)

今天，明報《星期日生活》的一篇專題「給我一個投票的理由」，正是早前友人飯局中的一個「圍剿」話題：

友人M：「四年才一次可以有話事權，點解要白白放棄？」
友人A：「有乜用吖！議員可以幫我搵份唔駛點做、但又攞幾萬嘅工咩？」
友人S：「係囉，咪又係要日日做足10個鐘，仲要食個個月加價嘅快餐！」
友人M：「但唔出聲的話，永遠唔會改變喎！你仲想見XXX (某議員)霸住個位唔做野咩？」
友人A：「現實d啦！大把人都係收入與資質不相稱架啦！咪一樣升官發財！」
友人S：「而且都唔知邊個有料到，人地投咪得囉！」
友人M：「你無主見嘅咩？無聲出嘅野仲唔夠多呀？淨係搵十幾萬請咩副局長同政治助理已經夠頂X啦！幾多人連十幾蚊食餐飯都要計過度過呀……」

激動得差點要在公眾場合做場大戲。當然，人人有自己的權利，這才是香港嘛！不過，撇開什麼公民責任這些虛無縹緲的道德要求，我今天一定會投票，是因為：

- 物價真的超級高漲，早上才買了一棵西蘭花、一條玉子豆腐和一包金菇，竟然要十八蚊！

- 貧富已經老死不相往來，長此下去窮人只會被迫進牆角，物極必反；

- 打工仔面對越來越多不公平，公司裡只有一半工作量的人竟然拿自己數倍人工，繼續消遙自在；

- 本城繼續往「錢」途發展，只要利益不要文化，令人窒息而且(被外人)厭惡；

- 要花沒花、要草沒草，人均收入高但人民素質差，經過SARS仍洗不掉傲慢、急功近利、走精面沒內涵的城市形象。

大概每個人都有投不投票的理由，請問心一句：這是你想要過的生活嗎？如不，請以行動來表態，這比去遊行示威或衝擊政府總部，容易得多！